الطريقة الصحيحة والكود الصحيح لعمل حقوق او اشياء اسفل المنتدى كما في منتدانا

تاريخ التسجيل : 03/05/2009

" الثــــــقب الاســــــــــــــود المصــــــــــــري ! " .. ,

اولا الثقب الاسود هو ثقب نظري في الفضاء بيحصل لما يبقي جزء من الفضاء جازبيته عاليه جدا جدا لدرجه انها بتمتص حتي الطاقه بكل أنواعها . حتي الضوء بيمتص داخل جازبيته الثقب الاسود و عشان كده مبيعرفوش يشوفوا ايه الي جواه لانهم علشان يشوفوا محتاجين نور و النور مابيدخلش جوا الثقب الاسودبل بيتكسر و يمتص ... و علشان كده سمي بالثقب الاسود .

انا عارف ان الكلام ده ممكن يكون معقد زياده انا حاولت ابسطه علي قد مقدرت بس في كل الاحوال الثقب الاسود ده هوه الحته اللي اي حاجه فيه بتضيع حتي النو ...

نروح بقه للثقب الاسود المصري ... الحجات بتاعتنا بتروح فين .. !!
مش الاشياء الماديه يعني انا اقصد الانجازات الحضاريه الثقافيه بتاعه الاقوام اللي عاشت علي الارض الي احنا عايشين عليها دي بتروح فين ...؟ يعني هل العرب دول كلهم يبان عليهم ان كان عندهم اخر حضاره عظيمه في التاريخ القديم كله هل الشعوب العربيه حد يصدق ابدا ان كان فيهم و منهم جابر ابن حيان و ابن سينا و ابن رشد و الفرابي و الخوارزمي و الرازي و ابن النفيس و ابن خالدون و الحسن ابن الهيثم و مئات غيرهم ..!
العلم الي الناس دول أبدعوا و " عبقروا " فيه راح فين ؟؟ خدته اوروبا و كملت عليهو اضافت له و أكيد كان ليه دور كبير جدا في اللي وصلوا له دلوقتي ... لكن برضه بيفضل السؤال : ما فضلناش حاجه من ليه ؟؟

بلاش العالم .. العلم اتسرق , بالله عليكم حد يصدق ان مصر ديه طلعت صلاح جاهين و فؤاد حداد و جمال حمدان و نجيب محفوظ و صلاح عبد الصبور و يوسف ادريس و عشرات غيرهم برضه ! .. الشغل العبقري الي عملوه كل السابق ذكرهم إزاي مغيرش فينا حاجه ؟؟ إزاي احنا عاملين كده زي ميكون عمر محد فينا فكر في فكره و لا كتب كتاب و لا حد قراه !

طيب بلاش .. من يوم ما وعينا علي الدنيا احنا و الي قبلنا بنسمع كلمات من نوعيه " الارض عرض " و اللي يفرط في ارضه يبقه مش عارف ايه ... و غيره و غيره . و نتفرج علي فيلم الارض و نعيط و احنا شايفين الحج ابو سويلم بيتسحل في الارض و مع ذلك مكلبش فيها لسه بالرغم من شوك القطن و الالم و الدم و الدموع .. فكلنا اعتقدنا إن حب الارض ده و فدائها بالعمر نفسه شيء طبيعي جدا عند الفلاح بتعني له الارض كل حاجه و بعدين راحوا كل الفلاحين مجرفين ارضهم عشان يبيعوا الطمي و التاريخ و العرض و الطول لمصانع الطوب فياخدوا فلوس ! إزاي حصل كده ؟؟ إزاي اول فلاح في تاريخ الأرض باع ارضه و جرفها ؟؟ ده ملوش علاقه بالتعليم و التحضر علي فكره دي ثقافه , ثقافه الفلاح نفسه عن أرضه ... راحت فين ؟؟

طيب بلاش كل دول , تعالوا نبص علي الثقب الاسود من زاويه تانيه خالص . من ما وعيت انا عالدنيا و مصر بتتكلم عن المصريين بيرموا زباله في الشارع و مابيقفوش في الطابور و الأتوبيس مابيقفش جنب الرصيف و الناس بتجري علي الاتوبيس مع انه حيقف كمان 3 ثواني ... ده غير بقه ختان البنات و المغالاه في طلبات الزواج ... ده غير بقه إن لما كل الناس يبقوا دكاتره و مهندسين مين هيشتغل الحجات التانيه ؟؟ .. و الثانويه العامه و التنسيق .. و غيرهم من ملفات قال ايه اصلاح التعليم .. و لا تسرفوا في الاكل في رمضان .. و ليه بنصرف فلوس كتير علي النعي و ليه شيوخ الجوامع بيزعقوا في الميكرفون .. و ليه فيه ميكروفون اصلا ما دام بيعرفوا يزعقوا .. و ليه فيه ميكروفون اصلا وسط ما الناس عايشه .. !

و بالمناسبه برافو للسيد عادل لبيب محافظ الاسكندريه علشان كان زكي كفايه انه يعترف ان الناس مش هتبطل تصلي في الميكروفون و يكتفوا بالاذان بس و راح بشجعاه يحسدج عليها شايل لهم الميكروفون من بابه ... برافو , عقبالنا كلنا ان شاء الله و علي سيره الميكروفونات و السماعات هوه ليه الفرح بتاعنا عامل كده ؟؟ و ليه العزا عامل كده ؟؟ و غير كل ده اصلا روتين و فساد و كوسه و فشل اداره و اهدار موارد و الف حاجه تانيه ... ناس كتير بيفكروا في المشاكل دي و غيرها بيكتبوا مقالات و كتب و بيطلعوا في التليفزيون يقولوا و عروقهم نافره " لازم يا جماعه يبقه عندنا كذا " .. " مينفعش طول عمرنا نفضل نعمل كذا " .. " مستحيل نقبل ان كذا " انا لا اقصد الانتقادات الموجهه للحكومهلان دي دايما اصعب انا الي اقصده الحجات اللي الناس مسؤله عن تغييرها .. بيسمعوا كل ده و بيقروه و بيتفرجوا عليه و بعدين بيروح فين .. ؟؟

الفيزيا بتقول ان الطاقه عمرها مبتتبدد , بيتغير شكلها الي نوع تاني بس . الطاقه الكبيره المهدره بقي من قبل كل من حاول اصلاح او تغيير او تعديل ايا مما سبق او غيره .. بتروح فين ؟؟ ليه ما بيحصلش اثر تقدر تحس بيه لما الناس بتسمع كلام مقنع عن حاجه همه محتاجين يغيروها ؟؟

طيب خدوا ديه .. !

هل منطقي ان دين زي الدين الاسلامي عمره في الدنيا حوالي 1400 سنه دخل مصر من حوالي نصهم يبقي ملايين من مسلمينا عمالين يكلموا البرامج الدينيه و يسألوهم ايه الي بيفطر في رمضان .. ! ! ! " و الاذان أذن و انا في بقي اكل اتفه و لا ابلعه ؟ " . و غيرها و غيرها من الاسئله الي بتوري إن اغلب الناس مش فاهمين حاجه عن الدين من بابه . ده غير اصلا اساسا الي ميعرفوش حاجه و مبيسألوش ..
و كل سنه في الحج يقعدوا الناس قدام التليفزيون يشرحوا طقوس الحج " مع ان اللي سافر يحج سافر خلاص و حتي لو مسافرش , ما هو لما يروح هناك حيقلولوا انه يعمل ايه . الموضوع مش كيميا اصله " . الم يأن الاوان اننا نبقي عارفين بقي الحجات ديه كلها بعد سنين التاريخ ديه كلها و لا هنفضل نلك في العبادات الي الابد ؟؟ ما كل بيت يبقه فيهكتابين ثلاثه فيهم احكام العبادات كلها لما يعوزوا يتعلموا حاجه او يحتاروا في حاجه يبصوا في الكتاب و خلاص .. ايه الموضوع ! عمالين يسألوا نفس الاسئله و ياخدوا نفس الأجوبه . برنامج ورا برنامج و سنه ورا التانيه ورا العاشره ورا الميه ... الكلام ده كله بيروح فين ؟؟ مش الناس بتتعلمه برضه ؟؟ و لما الناس بتتعلم حاجه مش خلاص كده عرفوها ؟؟ و لما هم عرفوها مش بيقولوا لبعض برضه ؟؟ ليه الموضوع عامل زي ميكون في الصحرا كده ! .

و المسأله الاصليه بقي بخصوص الموضوع ده هي إن البني ادم ده كائن متتطور جدا و ذكائه مرعب و قدراته مزهله . و مش المفروض إننا نحصر الاسلام طول عمرنا في ايه حلال و ايه حرام . المفروض نطلع منه بحجات اعقد من كده عن السياسه و الفلسفه و تاريخ الانسان و مستقبله و معرفه ربنا عشان نعرف نستفيد من كويس ... علشان نعرف نستفيد منه اساسا . زي مالحمد لله يعني قله قليله جدا من المفكرين المسلمين بيعملوا .. و للأسف برضه المجهود اللي بيعملوه مش باين علي الناس ... ليه مش واضح عليهم ؟ عشان كله بينزل مع غيره في الثقب الاسود ...

عرفتوا يعني ايه الثقب الاسود اللعين ؟ . يعني كل ماتبني فيه ماتشوفش حلجه بتعلا ز.. كل متحط فيه ما يتمليش .. كل ما تزوده .. ما يزيدش .. فين بقه مكانه الثقب الاسود ده ؟؟ هي دي المفجأه فينا احنا مش في الفضاء و لا حاجه .. كل بني ادم فينا لازم يدور علي الثقب الاسود اللي في نفسه و يسده . الثقب النيله الاسود الي بيخلي الحجات المهمه الي المفروض يكتسبها و يتعملها و يرتقي بيها عقله و تثري بيها روحه , تروح علي الفاض .. و يفضل زي ما هو كده علي طول اللي بيدخل من هنا يطلع من هنا , زي الصنم .

للكاتب والمفكر احمد العسيلي ؛

[ . الموضوع الان مفتوح لارائكم / والجدير بالذكر بان هذا الثقب ليس مصري فقط .. بل هو عربي بشكل عام // تحياتي

الموضوع منقول من : هنا |مصدر النقل :شبكة ومنتديات إمبراطورية الإسلام

توقيع Free AuTHeR